Avanza la creación d’Alfaya, marca asturiana de compromisu llingüísticu pa empreses

La Direición Xeneral de Política Llingüística ta trabayando nel desendolcu d’Alfaya, una marca de compromisu llingüísticu pa empreses qu’espera llanzar próximamente. El primer avance del proyeutu ye’l rexistru por parte de la Conseyería de Facienda de ‘Alfaya, marca asturiana d’usu llingüísticu’ y la so representación gráfica.

Ésta ye una figura pública qu’esiste n’Euskadi dende’l 2009 baxo’l nome de BIKAIN, cuando se creó un Sellu de Compromisu Llingüísticu y el Certificáu de Calidá na Xestión Llingüística. Agora Asturies da’l pasu d’entamar daqué asemeyao cola intención de promocionar l’usu de les llingües propies n’ámbitos empresariales.

Anque ta entovía “verde”, según confirmara Política Llingüística a Asturies.com recientemente, la iniciativa Alfaya entama a garrar forma. Yá se conoz el logu que podrán llucir les diferentes empreses y entidaes qu’empleguen l’asturianu o’l gallego-asturiano na so actividá económica, una manera d’amosar al consumidor el so compromisu llingüísticu.

El proyeutu nel que se trabaya cuenta con afitar dellos niveles según el grau de compromisu llingüísticu. Asina, aquelles empreses a les que se-yos certifique l’usu del idioma podrá llucir el logu d’Alfaya que-yos correspuenda nel so etiquetáu o como distintivu nos sos negocios.

El BOPA de güei yá dio a conocer el mesmu y confirma que va tenese en consideración “el grau de normalización del usu, presencia y xestión del asturianu y/o gallego-asturiano” na so actividá profesional a la hora d’entregar la certificación.