Autores nel Camín va llevar a los ganadores de los Premios Lliterarios a 27 conceyos de marzu a mayu

Un total de 62 eventos del circuitu Autores nel Camín tán programaos ente marzu y mayu en 27 conceyos del país. Esta iniciativa, qu’arrancó n’abril del añu pasáu, tien como oxetivu poner en contautu col públicu a los ganadores de los diferentes Premios Lliterarios y d’artes escéniques.

Autores nel Camín va echar a andar esta tarde en Bual (19 horas, Casa da Cultura) con un alcuentru lliterariu que va dirixir Miguel Rodríguez Monteavaro, Premiu Ría del Eo de Poesía en gallego-asturiano cola obra ‘Oi, que diz mama que volvas’. Va ser el primer autor d’una llista na que tamién tán Pablo Texón (Premiu Xuan María Acebal de Poesía), Xilberto Llano (Premiu María Josefa Canellada de Lliteratura infantil y xuvenil), Ángel de la Calle (Premiu Alfonso Iglesias de Cómic), Blanca Fernández Quintana (Premiu Enriqueta González Rubín de Narrativa moza), Alberto Castro Gión (Premiu Quiastolita de Lliteratura infantil en gallego-asturiano), José Ángel Gayol (Premiu Xosefa Xovellanos de Novela) y Ramón d’Andrés, coordinador y revisor llingüísticu y lliterariu de la traducción de la Biblia al asturianu (Premiu Florina Alías a la Meyor Traducción), amás de Premiu Máximo Fuertes Acevedo d'Ensayu.

Pela so parte, la compañía teatral Producciones Nun Tris, últimu Premiu Nel Amaro de Teatru Profesional en Llingua asturiana y Gallego-asturiano, va representar ‘La reina de la guapura de Leenane’ en Sotu’l Barcu, Llangréu, Corvera, Ḷḷena, Cangas del Narcea, Grau, Carreño, Nava y Colunga. Otra manera, Carla Armas y Rubén García, reconocíos col Premiu Camaretá al Meyor Cantar na edición del 2021 por ‘El que conoz a tierra’ van actuar en Samartín del Rei Aurelio, Villaviciosa, Candamu, Colunga, Castrillón y Tinéu.

Tola programación de Autores nel Camín, a la que la Direición Xeneral de Política Llingüística dedica 50.000 euros, ta xestionada pola Sociedá Pública de Xestión y Promoción Turística y Cultural del Principáu d'Asturies y incluyida nel programa ‘Asturies, Cultura en Rede’. Pue consultase nesti enllaz.