Aumenten les visites al Muséu Arqueolóxicu d'Asturies

|
Ayalga visigoda atopapada n'Argandenes (Piloña)

El Muséu Arqueolóxicu d’Asturies recibe ente xineru y xunetu un 11% más de visitantes que nel mesmu periodu de 2016.

El Muséu Arqueolóxicu d'Asturies sigue na llinia ascendente en númberu de visitantes que caltién dende va dellos años, como queda reflexáu nes cifres correspondientes a los siete primeros meses d'esti exerciciu. Asina, hasta'l 31 de xunetu, 28.214 persones pasaron pol equipamientu, xestionáu pol Gobiernu del Principáu y que depende de la Dirección Xeneral de Patrimoniu Cultural. El númberu de visites amontóse'l 10,98% respectu al mesmu períodu de 2016, nel que'l centru recibió a 25.115 persones.

La comparanza cola revisión del mesmu periodu va cuatro años amuesa'l creciente interés pol muséu, yá que en 2013 visitaron l'equipamientu 17.830 persones ente xineru y xunetu, colo que les cifres rexistraes nesti exerciciu suponen una medra del 36,8% dende entós.

Amás del valor y el prestíu de la so colección permanente, el muséu revitalizóse nos últimos años cola programación d'esposiciones temporales de calidá oldeada y d'actividaes culturales, cola regularización de les visites guiaes pa estudiantes y la medra de les visites especializaes.

El Muséu Arqueolóxicu d'Asturies, amás de xestionar, catalogar y almacenar los oxetos que conformen les sos colecciones, y d'espublizar los sos conteníos de la manera más eficaz posible ente especialistes, estudiantes (existen programes p'alumnos de la Universidá d'Uviéu y de Restauración) y el públicu que lu solicite, desenvuelve unos trabayos de caltenimientu, restauración y caltenimientu esenciales na naturaleza del propiu equipamientu.

Llabores d'investigación y restauración

La estraordinaria riqueza patrimonial d'Asturies y la intensa actividá arqueolóxica faen que los llabores d'investigación y restauración se multipliquen. Amás del tratamientu de pieces que formen parte de la colección permanente, el departamentu de caltenimientu y restauración del muséu analiza'l numberosu material procedente d'escavaciones puntuales.

Nesti sentíu, apocayá restauráronse los materiales de la última campaña nel xacimientu de Argandenes, en Piloña, onde s'estudia una necrópolis visigoda. Dalgunos de los oxetos metálicos, analizaos en collaboración cola Unidá de Microsonda Electrónica de la Universidá d'Uviéu, dieron resultaos que los espertos consideren de sumu interés.

Nel departamentu de caltenimientu atópense anguaño diversos materiales procedentes del xacimientu de Picu L.lagüezu, en L.lena, un de los primeros asentamientos romanos n'Asturies. Parte d'estos materiales entá tán en tratamientu al presentar condiciones delicadísimes de caltenimientu, quiciabes poles condiciones climátiques a les que fueron sometíos o a la probeza del material de fierro.

Ente los nuevos afayos, foi restaurada tamién una punta de llanza alcontrada na cueva de la Cerrosa, en Suarías (Peñamellera Baxa), mesmo qu’una cuyarina llitúrxica de bronce de dómina románica, alcontrada na redolada de San Xuan d’Ables, en Llanera.

Esposiciones y actividaes culturales

Otru de los factores relevantes a la hora d'analizar la medra del interés del públicu pol Muséu Arqueolóxicu atópase na calidá de les sos esposiciones temporales, nos sos ciclos de conferencies y na diversificación de les sos actividaes culturales.

Anguaño, espunxéronse nel muséu l'amuesa 'Las primeras ciudades hispanoamericanas. Testimonios materiales', y l'exitosa 'Artifex, Inxeniería romana n'España', a la qu'acompañó un ciclu de conferencies y un programa de visites guiaes, y que va permanecer abierta hasta finales del próximu mes.

Na semeya: Ayalga visigoda atopapada n'Argandenes (Piloña).

Contador Estadistiques