Aumenta un 5,6 por cientu el númberu de turistes que s'agospió n'hoteles asturianos en mayu

138.311 turistes durmieron en mayu n'hoteles del país, con un aumentu de los visitantes estranxeros, según los datos espublizaos pol Instituto Nacional de Estadística (INE). En comparanza col añu anterior, supón una medría de 5,6 por cientu.

Les estancies, pela so parte, medraron un 7,6 por cientu, hasta algamar les 249.083. Los datos confirmen, amás, l’enclín al aumentu del turismu internacional. Los hoteles asturianos acoyeron 32.372 viaxeros procedentes d’otros estaos y contabilizaron 55.063 nueches d’estancia, lo que supón medríes del 8,8 por cientu y el 16,1 por cientu, de manera respeutiva.

De xineru a mayu, estos establecimientos recibieron 507.174 turistes, un 4,1 por cientu más que nel mesmu periodu del añu anterior, mentes que se rexistraron 932.469 estancies, lo que supón una medría del 5 por cientu. La llegada de visitantes internacionales, con un total de 71.727, aumentó un 11,6 por cientu nos primeros cinco meses del añu.

Les estancies (135.714) tamién reflexen una medría, nesti casu, del 19,7 por cientu. Otra manera, el personal emplegáu nos hoteles asturianos aumentó un 4,3 por cientu en mayu en comparanza col mesmu mes del 2015, y un 5,9 por cientu si se garra abril como referencia.