Aumenta la participación nes eleiciones al Rectoráu de la Universidá d'Uviéu

El vienres va celebrase la votación de manera telemática por mor de la pandemia.

6.956 persones de les 23.992 con derechu a votu nes eleiciones a Rectoráu verificaron la participación nel sistema Invote, l'escoyíu pola Universidá d'Uviéu para esta cita, una vegada fináu ayeri'l plazu. Supón un 28,99 por cientu del censu, cuando nel 2016 la partipación quedó nun 26,67 por cientu na segunda vuelta –naquel momentu foi presencial–, con un aumentu nos cuatro grupos.

Nel del personal docente permanente, el que tien más pesu nel votu ponderáu (un 55 por cientu), apuntóse'l 94,26 por cientu, un 5,95 por cientu más, mentes que nel non permanente (10 por cientu) foi un 70,36 por cientu, lo que supunxo una medra del 12,74 por cientu. Namái 4.079 estudiantes (25 por cientu) de los 20.508 matriculaos, un 19,89 por cientu. tien la intención de participar, cantidá baxa pero que supón una medra del 0,71, y del personal d'alministración y servicios (10 por cientu), un 83,57 por cientu, un 7,44 por cientu más.

La votación va principiar a les 10 hores y va allargase a les 19 hores, col actual rector Santiago García Granda y l'aspirante Ignacio Villaverde, como candidatos.

Na semeya, estatua Fernando de Valdés Salas nel Edificiu Históricu de la Universidá d'Uviéu.