Aula 18 abre’l plazu pa presentar curtiumetraxes pal so concursu

El 17 d’agostu ye’l día caberu pa presentar cintes pal decimosestu concursu de curtiumetraxes qu’entama l’asociación Aula 18 de Samartín del Rei Aurelio. Les obres pueden ser tanto n’asturianu como en castellanu.

El certame, de calter estatal, va tener llugar en seronda y va axuntar en L’Entregu, como ye vezu, a dalgunos de los meyores curtiumetraxes fechos dende’l 1 de xineru del 2010, fecha que pon como llende la organización. El ganador del primer premiu va llevar 1.000 euros de recompensa, mientres que’l meyor curtiu fechu n’Asturies y el meyor en llingua asturiana van recibir 200 euros caún y a distribuyise per un añu al traviés de Festhome; mientres, el meyor rodáu en Samartín va ganar 100 euros.

Los realizadores interesaos en participar han d’unviar les sos creaciones al Conceyu de Samartín del Rei Aurelio, cai Nicanor Piñole 2 del códigu postal 33950 de Sotrondio, enantes del 17 d’agostu acompañaes d’una fotocopia del DNI, una semeya del autor, el currículu, l´impresu d´inscripción de la ficha téunica y artística, y dos semeyes del curtiu en papel y en discu. L’Asociación Cultural Aula 18 va facer una seleición ente les cintes recibíes, pa que depués el públicu decida los ganadores al traviés d’una votación popular.