¿Aú? protagoniza’l conciertu del VII Festival de Bandes de Gaites Villa de Ribeseya

Dos formaciones asturianes y una gallega participen nel VII Festival de Bandes de Gaites Villa de Ribeseya, entamáu n’alcordanza d’Hugo Fernández y de David Mateos ‘Puru’. ¿Aú? protagoniza’l sábadu’l conciertu del certame, qu’echa a andar el vienres.

El recuerdu de los dos músicos finaos de forma prematura nun desapaez en Ribeseya, que dedica esti festival al gaiteru de la Banda Gaites Ribeseya y al percusionista de Corquiéu. Asina, mientres mañana y el sábadu van entamase delles actividaes na so memoria.

Un taller de baille, a cargu del Grupu Baille El Corveru va abriles a les 19 hores, pa siguir a les 21.30 hores con un pasucais nel que van tomar parte los integrantes d’esta agrupación y la Banda Gaites Ribeseya. La folixa va siguir a les 22.15 hores nel Chigre’l Corquiéu con una sesión con escenariu abiertu.

Escenariu na Plaza Nueva

El sábadu va entamase un taller nuevu a les 12.30 hores, a cargu de Martín Poladura, sobre ‘Conceutos básicos d’afinación y mantenimientu de la gaita asturiana’ cola Escuela de Música de Ribeseya como sede. L’actu central del eventu, el festival de bandes de gaites, va comenzar a les 18 hores na Plaza Nueva cola participación de les bandes Conceyu de Siero, Ribeseya y la gallega Nova Fronteira B&C, amás d’El Corveru.

Yá de nueche, l’actuación de ¿Aú? a les 23 hores va poner el ramu a estes dos xornaes dedicaes a la gaita y la música tradicional. Rubén Bada (voz, bouzouki y guitarra), Ruma Barbero (bodhran), Marga Lorences (acordión) y Dolfu R. Fernández (voz y violín), nomes bien conocíos de la escena, conformen esti cuartetu folk.

Na semeya, ¿Aú? mientres una actuación previa en Ribeseya.