Atlántica XXII anuncia'l pieslle de la revista

|
Portada númberu 62 d'Atlántica XXII

El númberu 62, nestos momentos nos quioscos, será l'últimu "al menos nesta primer época", apunta la editora Letras Atlánticas.

La sociedá asturiana alboreció esta mañana con una de les peores noticies que pue recibir: el pieslle d'un mediu de comunicación. Atlántica XXII, revista dedicada al periodismu d'investigación qu'echó a andar en marzu del 2009 con una portada na que se destacaba'l reportaxe 'Los dueños de Asturias' sobre los grupos empresariales con poder d'influencia nel país, baxa la persiana diez años depués por mor de la "delicada situación económica" pola falta de publicidá.

"Les ventes, y sobre manera les suscripciones, verdaderu sostén del proyeutu dende'l principio, siempre foron óptimes. Inclusive escelentes nel casu de les suscripciones, que nunca dexaron d'aumentar y nel momentu del pieslle sumen 800, sobre manera de suscriptores d'Asturies, pero tamién de toda España y de dalgunos países estranxeros", apunten dende Atlántica XXII, que señalen principalmente a l'ausencia de publicidá institucional como causa principal de los apuros económicos de la espublización. "Foi la firida mortal. Atlántica XXII soportó mientres diez años y medio un boicot auténticu de la publicidá institucional, práuticamente de toles Alministraciones, porque enxamás recibió'l tratu equitativu, y obligáu llegalmente, que-y correspondía poles sos ventes y la so incidencia social en nenguna d'ellas", afirmen al tiempu que califiquen de "paradoxa tremenda" que se dea con "un Gobiernu que diz combatir el paru y impulsar la riqueza".

 

Contador Estadistiques