Atentáu contra CCOO na viéspora del 1 de mayu

Un atentáu con bombes incendiaries dañó esta madrugada les oficines del sindicatu Comisiones Obreres de Xixón, asitiaes nel segundu pisu del edificiu de la Casa Sindical de la cai Sanz Crespo. Según paez, les bombes yeren de fabricación casero y taben iguaes por gasolina y xirones d'insecticida. Les bombes,qu'españaron sobre les dos de la madrugada, ficieron daños materiales en muebles de les oficines de CCOO y arreventaron dellos cristales de les ventanes del edificiu


La dirección de CCOO diz que nun sabe d'au pue venir un actu d'estes característiques, anque'l fechu de tar allegándose a la celebración del 1º de mayu remembra a los atentaos contra sedes de partíos políticos que se ficieron na viéspora del 8 de setiembre, día d'Asturies. Ello ye que, lo mesmo que naquella ocasión, tamién apaecieron nel llugar de los fechos papeletes escrites n'asturianu, con frases contra los sindicatos mayoritarios CCOO y UXT y contra la Federación d'Emprearios FADE.

D'otra manera, CCOO Y UXT presentaron esta mañana los conteníos de la celebración del 1 de mayu, fiesta del trabayu, que los dos sindicatos mayoritarios van celebrar con una manifestación conxunta en Mieres. Col lema "Constitución Europea Para la Paz, el Pleno Empleo y el Bienestar" les dos centrales quieren sorrayar la trescendencia d'esti intre nel procesu d'ampliación de la UE y la necesidá de que se faiga una Europa social y con derechos contra la llectura d'una Europa fecha namás que por "millones de consumidores". El conteníu "europeista" de la marcha va espeyase tamién na petición de que nun se retiren los fondos estructurales a Asturies.

Les centrales minoritaries CSI y CGT y el sindicatu d'Enseñanza SUATEA van facer otra manifestación aparte'l 1 de mayu. La convocatoria d'estes organizaciones ye a les 12 en na plaza del Umedal de Xixón, onde'l lema va ser "Empléu dignu, sí. Guerra, non. Escuela pública, laica y asturiana" . Los convocantes sorrayen que n'Asturies algámense les mayores cotes de esfarrapamientu económicu del Estáu y de la UE y quieren denunciar que la precariedá llaboral supera enforma l'altísima tasa estatal. Na convocatoria, los sindicatos minoritarios critiquen tamién la falta de recursos del nuevu gobiernu autonómicu, al qu'acusen de siguir trabayando "coles mesmes recetes" qu'aplicaron gobiernos anteriores no económico. El llamáu de CGT, CSI y Suatea tamién fai un aparte pa condenar l'actual política llingüística y cultural del Principáu