Ataquen a Galán y a la empresa Cuatro Gotes tres del señalamientu de dos diputaos anti-oficialidá

Pegamín na pesllera en dos ocasiones nel estudiu de la productora Cuatro Gotes y el llanzamientu d’un güevu dende una vivienda, a lo qu’hai que sumar insultos y acosos en redes. Ye la situación que tien que vivir el so alministrador Inaciu Galán, que denunció los fechos a la Policía'l 24 de xineru, tres del señalamientu fechu por Ignacio Blanco y José María Figaredo, entrambos diputaos de VOX.

El 6 d’ochobre, nuna intervención na Xunta Xeneral, Blanco cita unes declaraciones de Galán, al que califica de “delirante”, acusándolu de “querer un puestín”. Nun quedó ehí la cosa, llevando tamién el señalamientu a redes sociales, emplegando la cuenta propia del diputáu y la de “les d’otres entidaes vinculaes, tales como les de VOX Asturias, el Club del Viernes y la Plataforma contra la Cooficialidá, colgando videos d’intervenciones míes en documentales y reportaxes televisivos, nos que se me desacreditaba y señalaba, incluyendo captures de documentación del BOPA onde apaecíen trabayos fechos pola empresa de la que soi alministrador, Cuatro Gotes Producciones, SL”, esplica’l denunciante nel documentu presentáu a les fuercies de seguridá nel momentu de facer la denuncia con captures y abonda información al respeuto.

Once díes depués, el domingu 17 d’ochobre, recibió’l llanzamientu d’un güevu dende una ventana d’una vivienda de l’avenida Torcuato Fernández Miranda, en Xixón, que nun llegó a impautar por centímetros, tres tar paráu falando con una persona. El 20, miércoles, los trabayadores de Cuatro Gotes nun podíen acceder al so puestu al tar la pesllera tapada con pegamín.

La campaña de señalamientu y descreitu nun aparó neses selmanes y sigue entá agora, “incluyendo cuentes reconocíes del entornu de VOX, y diputaos como José María Figaredo”. Un segundu ataque al llocal de la productora, cola mesma execución, esta vegada na madrugada del domingu 23 de xineru, llevó a Galán a denunciar toos estos fechos a la Policía’l día siguiente.

Esa selmana precisamente apaecieron amás pegatines col lema ‘Coficialidad no. Llingua inventada’ y ‘Pumares traidor, cooficialidad no” nes cais cercanes al estudiu de Cuatro Gotes, lo que convida al denunciante a venceyar dambos fechos.