Ataque a la freba d'internet

Esta selmana rexistrose l'apaición d'un virus nuevu qu'ataca a les máquines servidores, los ordenadores a los que-yos pidimos les fueyes web. Slammer, que ye como se llama esta peste, dicen que vien de la parte de Hong-Kong, y yá ye en pocos díes el virus más peligrosu de va añu y mediu p'acá según los espertos. L'ataque del Slammer, qu'entamó'l sábadu llegó a dañar a 5 de los 13 servidores que faen la base d'internet. Nos EUA, la empresa American Express dixo que los sos clientes nun pudieron acceder a los servicios de tarxetes de créditu por culpa de los ataques del virus, qu'estragó n'Asturies dellos servidores de la Universidá d'Uviéu. Sicasí, más que la noticia de la llegada del virus y de la capacidá que tien pa infestar servidores, lo que más llama l'atención son les reacciones que se produxeron dende dellos sectores y partes interesaes. Microsoft, en conociéndose que'l virus atacaba a máquines servidores con software d'ellos, dixo que la culpa yera de los que xestionaben los servidores por nun tar al tanto de les actualizaciones en materia de seguranza qu'apurría la casa. Otro tanto dixo'l responsable de la casa Panda Software, pa quien esti ataque "pudo evitase perfectamente". Con too y con ello, la rempuesta más chocante vieno dende la xuntanza antiglobalización del Foru Social de Porto Alegre, que culpó a la propia Microsoft del espardimientu del virus. Según Carlos Afonso, director de la Rede de Informação para o Terceiro Setor del Foru Social, la culpa de qu'haya virus ye de les cases de software propietariu, en cuantes que sólo'l fabricante del productu pue facer cambeos pa iguar estos furacos de seguranza qu'aprovechen los virus.