Asturtoons presentó trés lilbros pa la reciella

La casa Asturtoons, l'aventura editorial nueva del dibuxante y escritor del Infiestu Enrique Carballeira, presentó una colección nueva de lliteratura n'asturianu empobinada pal públicu infantil. La colección, entitulada "Llingua de Trasgu" ta editada a tou color y tien un diseñu mui curiáu pa que les llectures-yos llamen l'atención a los neños. Por de pronto, los trés primeros títulos de la colección acabante estrenase entitúlense respectivamente "Los viaxes de Kiki" obra d'Ana Belén Iglesias na que s'espeyen les aventures d'un mur; "¡Menudu elementu!" de Miguel Rojo Martínez, que cunta la historia d'un dinosauriu n'Asturies de la dómina del xurásicu, y "Ana de los animales" l'aventura d'una neña que se comunica colos animales y que sufre les envidies d'un magu malváu, obra del mesmu Quique Carballeira, que ye tamién el diseñador de la colección y l'ilustrador de los trés volúmenes qu' igüen hasta agora esta nueva iniciativa de Asturtoons.