Asturies.com ufre un videu del VIII Desfile da Máscara Ibérica de Lisboa

El 11 de mayu tuvo llugar en Lisboa’l VIII Desfile da Máscara Ibérica, cola participación de Los Sidros y La Comedia. Esti sábadu, dientro del Festival Arcu Atlánticu, diez mazcaraes van percorrer El Muro nun acontecimientu similar.

 

D’esta forma, Xixón sigue’l camín de la capital portuguesa y Zamora, ciudaes que tolos años celebren desfiles importantes cola participación de mazcaraes de dellos puntos de la Península Ibérica. Nel casu de Lisboa, alredor de 500 persones pertenecientes a 30 grupos participaron esti añu na octava edición del Desfile da Máscara Ibérica baxo la mirada atenta de 70.000 persones, según cifres manexaes pola organización. Asturies.com tuvo presente nesti acontecimientu y ufre a los sos llectores una muestra de los que se vivió esi 11 de mayu nel llugar onde desemboca’l ríu Tejo.

 

Estes imáxenes sirven d’adelantu de lo que les persones que s’averen mañana a El Muro van poder contemplar a partir de les 20 hores. Trátase d’un desfile más pequeñu, anque igual de máxicu y coloríu, cola presencia de diez mazcaraes: l’Antruejo de Villanueva de Valrojo (Zamora), Folión y Boteiros de Vilariño de Conso (Ourense), Folión y Boteiros de Viana do Bolo (Ourense), Los Jurrus d’Alixa (Lleón), Toros y Guirrios de Velilla de la Reina (Lleón), Antruido de Riaño (Lleón), Antruido de Riello (Lleón), Los Guilanderos de Tinéu, Os Reises de Tormaleo y Los Sidros y La Comedia de Valdesoto. Una cita pa nun perder.

 

Inauguración del Festival Arcu Atlánticu

 

Los Sidros y La Comedia y el Folión y Boteiros de Vilariño de Conso van participar tamién güei na gala d’inauguración del Festival Arcu Atlánticu, que va tener llugar a les 20.30 hores nel Teatru Xovellanos. Nella va proyeutase’l audiovisual ‘Nantes y Gijón dos ciudades del Arcu Atlánticu a comienzos del siglo XX’ y va estrenase la ‘Obertura columnas de Hércules’, creada pol musicólogu, compositor y pianista asturianu Eduardo García Salueña de manera espresa pal certame. Tamién va tener llugar una actuación del bretón Roland Becker, ún de los principales etnomusicólogos del Estáu francés. Nel descansu, sobre les 21 hores, les dos mazcaraes van salir al patiu de butaques, pa depués dirixise al Paséu de Begoña, onde animarán la cai. El preciu pa presenciar esti espectáculu ye de 10 euros.