Asturies.com, primer mediu independiente

Los datos qu'apurre la Oficina de Xustificación de la Difusión (OJD) ponen a Asturies.com como'l tercer mediu electrónicu con más visites d'Asturies. Sigún OJD, Asturies.com tuvo, nel mes de xineru, una media diaria de 1.631 visites (50.561 nel mes), bien lloñe de los númberos de los dos medios más fuertes del país, La Nueva España y El Comercio, que perpasaron les 6.500 visites diaries, anque dende llueu nun ye la intención d'Asturies.com entrar a competir con dos periódicos que tienen abonda difusión a través de les sos versiones impreses y que tan en manes de grandes grupos editoriales. De cualquier manera, Asturies.com sí tien más visites que'l tercer periódicu asturianu, La Voz de Asturias, que rexistró en Xineru 992 visites diaries (30.754 en tol mes).Estos datos afiten a Asturies.com como'l primer mediu independiente na rede asturiana, y tamién vienen a reconocer la viabilidá de la esistencia d'un mediu escritu n'asturianu que yá lleva cinco años na rede, una viabilidá que ye posible gracies a tolos llectores que diariamente entrais nestes páxines y a los que queremos davos les gracies por ayudanos a obtener esti resultáu.