Asturies.com presenta la so emisión de radio

Dende ayeri pela tarde, Asturies.com ufierta a los sos llectores un nuevu serviciu de radio on-line que ye un esfuerzu dende esti mediu por amestar un un complementu, que nos abulta de gran interés, a los conteníos del que ye'l tercer mediu electrónicu más visitáu d'Asturies.

Gracies a un conveniu de collaboración ente Asturies.com , la Universidá d'Uviéu y la primer empresa de telecomunicaciones asturiana, Telecable, Asturies.com abre una estaya nueva cola difusión de señal de radio. La emisión d'Asturies.com Radio va ser continuada les 24 hores del día, y nella van dir amestándose, pasin ente pasu a lo llargo de les prósimes selmanes, conteníos nuevos hasta iguar una programación estable.

Pel momentu, Asturies.com presenta una parrilla d'emisión en prebes na que pue sentise música d'autores y grupos asturianos.

Pa poder acceder al serviciu ye preciso disponer del reproductor Real One, que pue descargase de baldre na web de Real.com.

Contamos con que la emisión tenga una bona acoyida por parte de los llectores d'Asturies.com, a los que convidamos a espresar les sos opiniones sobre la mesma mientres dura esti periodu de prebes. Pa ello encamentamos al nuestru estimáu públicu a unviar cualquier suxerencia o comentariu que se quiera facer sobre Asturies.com Radio al traviés del corréu electrónicu redaccion@asturiactiva.com. Gracies a toos y a toes por facer posible esti mediu.