Asturies.com pon en marcha l’especial ‘Eleiciones 2011’

El 22 de mayu van celebrase les eleiciones nacionales y de conceyos y n’Asturies.com queremos ufrir a los nuesos usuarios tola información d’esta cita coles urnes. Por ello, echamos a andar l’especial ‘Eleiciones 2011’.
 
Noticies, entrevistes, les encuestes que vayan saliendo y l’axenda de los políticos van tener sitiu nesti espaciu que va dir reforzando conteníos xornada a xornada según avance la campaña eleutoral que principia esti vienres a les 00 hores. La incorporación de partíos con posibilidaes d’aspirar a la presidencia del país como Foro Asturias Ciudadano o la xunión de dos de les formacionales del nacionalismu d’izquierdes na coalición Bloque por Asturies-UNA, dan a estes convocatories eleutorales un interés especial en comparanza coles convocatories anteriores.
 
Los usuarios que s’averen a esta seición nueva d’Asturies.com tamién van poder consultas los resultaos de convocactories anteriores y consultar los programes eleutorales de les 18 formaciones participantes nes eleiciones gracies a un llistáu con enllaces a les web de los partíos. D’igual forma, los nuesos llectores tamién van conocer les opiniones y actividaes de los candidatos principales a les eleiciones al traviés d’una ventana na que pueden vese los ‘tweets’ espublizaos por ellos mesmos. L’enllaz pa entrar a l’especial ‘Eleiciones 2011’ ta situáu na parte derecha de la pantalla.