Asturies.com estrena la so hemeroteca

Dientro del procesu de remocique xeneral d'Asturies.com entamáu el mes pasáu cola presentación del nuevu diseñu, esti diariu dixital pon agora a disposición de los sos llectores una hemeroteca onde puen acceder a tol estoyu históricu de noticies espublizaes n'Asturies.com dende l'añu 2002 en p'alantre. Esti novedosu serviciu d'hemeroteca, al que pue accedese lo mesmo dende'l menú xeneral de secciones y servicios d'Asturies.com asitiáu na parte d'arriba de la web que dende'l caxellu de busca que comparte col buscador Úlos? na portada d'Asturies.com, permite facer busques por palabra cenciella y tamién por delles palabres, neto que peñerar la busca de les noticies por rangos de feches y por secciones temátiques.

Continúa asina'l procesu de remocique d'Asturies.com, que d'equí a la vuelta de pocos díes va dar otru pasu más cola integración na plantiya nueva de diseñu de los populares tableros d'anuncies, un pasu que va aprovechase tamién pa inxertar funcionalidaes nueves nos mesmos.