Asturies.com afítase perriba de les 60.000 visites

L'últimu informe de la Oficina de Xustificación de la Difusión (OJD) qu'audita l'audiencia de los medios de comunicación nel estáu, afitó p'Asturies.com nel mes de payares los bonos datos de setiembre, con un resultáu absolutu entós de 61.000 visites. Esta vegada rexistrose un absolutu de 61.705 visites, pero esmigayando los datos de l'auditoría, payares foi incluso meyor que meses anteriores, al conseguise un númberu de más de 1.500 visites diaries na portada (home page d'Asturies.com) y algamase un resultáu de 282.185 páxines descargaes, con una media de 4,57 páxines per visita al web.

Estos datos vienen a afitar la xuba d'audiencia d'esti mediu de qu'acabó'l veranu p'acá y afiten a Asturies.com como'l primer mediu n'asturianu en difusión y el cuartu absolutu del país, en competencia colos grandes periódicos del país, los tres enxertaos en grandes grupos de comunicación estatales, qu'empleguen el castellano cásique esclusivamente y que xueguen cola ventaya de tener tamién un encontu en papel. Asina, La Voz de Asturias rexistró 100.796 visites n'ochobre (pendiente de l'auditoría de payares), mientres que El Comercio tuvo 244.568 y La Nueva España 439.217. Estos datos nun sedríen posibles ensin el sofitu de los nuestros llectores, a los que queremos facer partícipes d'ellos.