Asturies zarró xunetu con 3.370 paraos menos

El mes de xunetu finó con 80.083 paraos n'Asturies, lo que supón 3.370 menos en comparanza col mes anterior, según el balance últimu del Ministeriu d'Emplegu. Mentes, l'afiliación a la Seguridá Social aumentó en 4.428 cotizantes.

La direutora del Serviciu Públicu d'Emplegu del Principáu (Sepepa), Luisa Pérez, destacó ayeri que la medría de la cifra d'ocupaos, del 1,26 por cientu, dobla al del conxuntu del país y xube’l númberu d'afiliaos a 357.254 persones. La variación interañal reflexa que'l país cuenta con 4.606 persones más d'alta na Seguridá Social que va un añu.

No que fai respeuta a la cayida del paru, Pérez sorrayó qu'Asturies ye una de les trés comunidaes autónomes, xunto con Cantabria y Galicia, que rexistraron el mayor descensu. La cayida, del 4,04 por cientu, ta cuasi dos puntos percima de la media estatal.

Estos datos suponen les meyores cifres nun mes de xunetu n'Asturies dende l'añu 2010. Na comparanza interañal, l'amenorgamientu del paru ye del 7,47 por cientu. Asina, el país suma yá 34 meses consecutivos con cayíes interañales.

Tanto n'homes como en muyeres

El paru menguó tanto n'homes como en muyeres, asina como en tolos grupos d'edá y sectores d'actividá. El mayor amenorgamientu rexistróse nel colectivu de menores de 25 años. Por sectores, el descensu en términos porcentuales, un poco superior al 4 por cientu, ye asemeyáu na industria, la construcción y los servicios.

“Nel sector servicios, incorporáronse a un emplegu 2.387 persones, y fixéronlo n'actividaes venceyaos col turismu, como la hotelería y el serviciu de comíes y bébores, col comerciu y con servicios de caltenimientu a edificios y actividaes de xardinería”, esplicó Pérez. Na industria, constatáronse descensos mayores nes actividaes rellacionaes col metal y les empreses d'alimentación y bebíes.

Pela so parte, la construcción caltuvo l'enclín descendente n'inxeniería, edificios y actividaes especializaes. “Ye menester destacar que'l descensu interañal nes actividaes de construcción xubió al 16 por cientu, con 1.700 paraos menos que va un añu”, sorrayó la directora del Sepepa.