Asturies zarró xineru con 75.781 paraos

Asturies remató xineru col númberu más baxu de paraos nesti mes dende’l 2009, según los datos de paru rexistráu.

La cantidá de persones en paru asítiase en 75.781, 3.721 menos que va un añu (una mengua equivalente al 4,68 %). El Principáu encadena asina 64 meses siguíos de cayíes interanuales del desempléu.

La directora del Serviciu Públicu d’Empléu (Sepepa), Luisa Pérez, destacó que les cifres de xineru caltienen l’enclín positivu del mercáu llaboral, tanto na baxada del paru como nel aumentu de l’afiliación a la Seguridá Social. Ello ye que xineru acabó con 3.212 cotizantes más que va un añu. Son yá 51 meses siguíos de xubíes de l’afiliación.

La baxada interanual del desempléu constátase en tolos grupos d’edá y sectores d’actividá. Destaquen les mengües ente los homes (-6,45 %) y el sector de población de 25 a 45 años (-7,23 %), amás de na industria y la construcción, con mengües del 6,18 % y 11,78 %, respectivamente.

Al respective d’avientu, el paru rexistráu n’Asturies aumentó en 2.977 persones (4,09 %). Esta medría concéntrase sobre manera nel sector servicios, hasta tal puntu que supón el 96 % del aumentu total del mes. El términu de la campaña navidiega foi un factor decisivu, según Luisa Pérez: “La medría del paru ye habitual en xineru de resultes del final de la campaña navidiega, que favorez les actividaes rellacionaes col turismu y el comerciu, ente otros factores”. La directora del Serviciu Públicu d’Empléu añedió que “el comportamientu del paru n’Asturies foi asemeyáu al de les comunidaes autónomes vecines, daqué que tamién se ve nel conxuntu del estau, con una xubida del desempléu del 2,61 % al respective d’avientu”.

Otra manera, l’afiliación a la Seguridá Social asítiase al rematar xineru en 359.264 persones, lo que supón un descensu del 1,34 % en comparanza col mes anterior.

La directora del Sepea manifestó’l so enfotu en que’l númberu de paraos mengüe nos meses vinientes y se caltenga l’enclín de descensos interanuales siguíos del paru y aumentos de l’afiliación.