Asturies ye’l tercer territoriu onde más baxó’l paru en xunetu

Cantabria, Galicia y Asturies lideraron el descensu del paru en xunetu. Nel país rexistráronse 2.504 desemplegaos menos qu'en xunu, lo que supón una baxada del 3,55 por cientu, pa rexistrar un total de 67.992 persones, cifra más baxa dende xunetu del 2009.

La mengua en Cantabria y Galicia foi del 5,87 y del 3,91 por cientu, de manera respeutiva, siendo la media estatal una baxada del 0,86 por cientu. Los peores datos son de Ceuta (3,07 por cientu), Illes Balears (1,79 por cientu) y Navarra (1,61 por cientu), con un crecimientu del desemplegu.

“Les cayíes más relevantes del paru produxéronse nos conceyos con más actividá turística, fundamentalmente nel oriente, como Cangues d’Onís, Llanes, Ribeseya, Colunga y Ribadeva”, destaca Luisa Pérez, direutora del Servicio Públicu d’Emplegu del Principáu d’Asturies (Sepepa). Amás d’al turismu, tamién se refirió al crecimientu del sector de la construcción pa esplicar los bonos términos interañales.

En comparanza col añu anterior, Asturies rexistra una baxada de 4.851 paraos, esto ye, un 6,66 por cientu, tando la media del Estáu del 6,02 por cientu. Los mayores descensos danse en Castilla y Lléon (10,24 por cientu) y Cantabria y Galicia, dambos con un 10,15 por cientu, mentes que los territorios con menor baxada son Ceuta (3 por cientu), Andalucía (3,71) y Murcia (3,84 por cientu).

Pela so parte, l’afiliación a la Seguridá Social creció en 4.074 persones, un 1,12 por cientu, casi un punto más que nel conxuntu del Estáu, hasta los 368.109 cotizantes. En rellación a xunetu del 2017, aumentó en 2.546 personas (0,70 por cientu).