Asturies ye un añu más protagonista nel Festival Interceltique de Lorient

|
Xeitu camín del Festival Interceltique de Lorient

Esti vienres da comienzu’l certame de cultura celta más importante del mundu: el Festival Interceltique de Lorient. Dedicáu esti añu a Alba, Asturies va contar un especial protagonismu cola presencia d’artistes y bandes como Hevia, Dixebra o l'agrupación Xeitu.

En total va ser cerca de cien los asturianos y asturianes que van llevar la nuesa música y tradiciones a An Oriant dende güei hasta’l domingu 13, con actuaciones tanto nes cais como nos diferentes escenarios onde se desendolca’l festival. L’Interceltique, que vive la so cuarentena sétima edición, va contar cola presencia amás d’artistes internacionales como Amy Mcdonald, Hat Fitz & Cara, Altan, RunRig o Tri Yann.

La delegación asturiana va debutar mañana, a les 10 hores, nel Palais de Congrès con Vicente Prado ‘El Pravianu’, que va poner una clase maestra de gaita xunto col gallegu Pablo Seoane. A les 14.30 hores va tener la so primer actuación la Banda Gaites Candás nel Espace Marine, el recintu principal del festival, dientru del ciclu Musiques et Danses des Pays Celtes, sesión onde va tar acompañada por Rushen Silver Band (Mannin), Côr Meibion Orffiws Abertyleri a Chwm (Cymru) y Prince Charles Pipe Band of San Francisco (Estaos Xuníos).

A la mesma hora, nel Palais de Congrès, va aniciase’l prestixosu Trophée Mac Crimmon pour Solistes de Gaita, que tolos años enfrenta a cuatro gaiteros asturianos y gallegos, y que vien dominando Asturies dende’l 2013 colos trunfos d’Álvaro Álvarez Fernández (2014 y 2015) y Jesús Fernández González (2013 y 2016). Ésti últimu va tener la opción de repetir esti añu tres ganar el Memorial Remis Ovalle, mentes que van aspirar tamién a la victoria Fernando Vázquez Cárcaba, Jaime Álvarez Fernández y Xermán Álvarez Castañón.

Esta bayurosa primer xornada va completala Hevia, a les 22 hores nel Espace Marine, que va presentar ‘Al son del indianu’ nuna nueche que va compartir escenariu colos llocales The Celtic Social Club. Ésta ye una de les actuaciones más esperaes del festival, como bien vien destacando la prensa llocal estos díes.

Otra manera, nel Stade du Moustoir, llar del recién descendíu Lorient FC, va celebrase la primer de les Nuit Interceltique Bretagne, nel qu’Asturies va contar cola representación de la Banda Gaites Villa de Candás y el Grupo de Baile Xeitu, d’Uviéu, al igual que na Grande Parade des Nations Celtes, l’eventu más importante del festival, que’l domingu a les 10 hores va axuntar a miles de persons nes cais d’An Oriant. El restu de nueches intercéltiques van tener llugar el domingu, martes, miércoles y xueves.

Xira del trentenu aniversariu

Xeitu va actuar tamién nel ciclu Musiques et Danses des Pays Celtes el martes a les 14.30 nel Espace Marine’l nuna cita xunto con The Ulster Scots Agency Juvenile Pipe Band (Éire), Isle of Cumbrae Pipe Band (Alba) y el Grupo de Baile Cantigas e Agarimos (Galicia). Mentes, a les 15 hores nel Palais de Congrès, va actuar Anabel Santiago y los galeses Alaw.

A les 22 hores, nel Espace Marine, The BackYard Devils (Acadie) van caldiar l’ambiente pa l’actuación de Dixebra, que va entamar un conciertu especial dientro del so ‘Tour 87-17’ na so sétima actuación nel Festival Interceltique de Lorient. Pa la ocasión, la banda avilesina refuérzase colos hermanos Tejedor (gaita y acordión), Toño Gómez (trombón), Rubén Bada (bouzouki y violín) y Vito Álvarez (coros), a lo qu’hai que sumar la participación estelar en dos o trés cantares de la Bagad de Lorient.

Daes estes collaboraciones, el set-list de la banda va tar conformáu na so mayor parte col cantares averaos al folk-rock. Una actuación única que nun va dexar indiferente a los sos munchos siguidores bretones y a los asturianos que tolos años se desplacen a disfrutar del eventu intercélticu.

El gaiteru José Manuel Tejedor va participar tamién n’otru de los momentos cume del Interceltique, l’homenaxe al escocés Gordon Duncan (21.30 hores, Palais de Congrès), ún de los más importantes intérpretes del instrumentu, fináu nel 2005, nel que van tomar parte los sos paisanos Ross Ainslie, Ali Hutton, Ian Duncan, Fred Morrison, Calum Stewart y Bruce McGregor, y los bretones Piping Orchestra y Hervé Le Floc’h.

Fest Noz con presencia asturiana

El xueves, a les 22 hores, Anabel Santiago va repetir actuación, nesta ocasión na Quai de la Bretagne, onde va compartir escenariu col espectáculu llocal ‘A l’arrivée de mon retour’ de Trio Brou, Hamon y Quimbert, y Kermabon y Le Faix Project. Enantes, a les 21 hores, la banda asturbretona Amieva va participar nel ‘Honneur au Fest Noz’ xunto otres formaciones.

Xeitu va poner el ramu participación de la delegación asturiana n’An Oriant en Danses du Monde Celta’l vienres, a les 14.30 hores nel Espace Marine, col Grupo de Baile Cantigas e Agarimos (Galicia), Keltika Dancers (Alba), Hevva (Kernow) y Rinceoirí Cois Laoi (Éire). Otra manera, la delegación asturiana n’An Oriant va completala l’artista María Peña Coto, que va esponer nel Hôtel Gabriel na Expo Celtic Art.

Na semeya, Xeitu ayeri enantes de partir hacia An Oriant.

Contador Estadistiques