Asturies ye la comunidá cola incidencia acumulada más baxa de COVID-19

Namái la ciudá autonóma de Melilla tien cifres más baxes qu’Asturies n’incidencia acumulada de COVID-19 nos 14 díes últimos, según aseguró’l conseyeru de Salú, Pablo Ignacio Fernández Muñiz. El país rexistra 2,25 casos por cada 100.000 habitantes, siendo la media estatal de 14,59.

La web del Ministeriu de Sanidá pa la COVID-19 lleva ensin actualizar los datos dende’l pasáu día 21, polo que yera imposible conocer les cifres oficiales d’incidencia. Naquel momentu Asturies contaba con una incidencia acumulada de 4,7, teniendo meyores datos Melilla (2,3), Canarias (3,3), Andalucía (3,9) y Región de Murcia (4,6).

La intervención de Fernández Muñiz ayeri nel grupu de trabayu de la Xunta Xeneral sobre la COVID-19 permitió conocer de manera parcial los datos del ministeriu, que sí manexa la Conseyería de Salú. Asina señaló que n’Asturies la incidencia ye de 2,25, “la segunda más favoratible de toda España, con media de 14,59, y dende llueu mui llonxana al d’otres comunidaes autonómes con incidencies superiores a los 20 y a los 30 casos nuevos por cada 100.000 habitantes”.

Les cifres son inclusive meyores si tomamos como referencia la selmana última, cuando “disminúi a 0,49 casos por cada 100.000 habitantes. Únicamente tien menos incidencia qu’Asturies la ciudá autónoma de Melilla”. Poro, calificó de “bona” la evolución epidemiolóxica del país nesta fase 2 de la desescalada na que tamos anguaño.