Asturies ye declarada territoriu llibre de brucelosis bovina

|
Asturies ye declarada territoriu llibre de brucelosis bovina

Esta decisión de la Xunión Europea (XE) va aforrar trestornos a los ganaderos asturianos.

El Diariu Oficial de la XE espublizó recién esta declaración que supón qu’Asturies cumple colos requisitos establecíos na normativa vixente. Esto significa que nun se rexistró nengún albuertu o aislamientu pola enfermedá a lo llargo de polo menos trés años, y implica tamién que polo menos el 99,8 por cientu de los rebaños foi quien a sacar l’estatutu oficial d’indemnes de brucelosis cinco años siguíos, amás de cuntar con un sistema d’identificación y rexistru.

La XE tomó esti determín depués de que la Conseyería de Desarrollu Rural y Recursos Naturales presentare la documentación que demuestra que se cumplen les condiciones establecíes. Asturies yá se declarara país llibre de brucelosis ovina y caprina nel 2013.

D’equí p’arriba namás va ser necesariu un muestréu anual nel 20 por cientu de les esplotaciones. Amás, nun va ser menester efectuar pruebes pal movimientu del ganáu bovino nin esperar polos resultaos del llaboratoriu, lo que supón menos tiempu pa llograr la carta verde. Tamién se va producir un aforru en tubos, análisis o tomes de muestres y van evitase trestornos importantes tanto a los ganaderos como a los animales.

Sicasí, va ser necesario caltener l’estatus consiguíu y siguir n’alerta sobre manera énte animales que vienen de zones que nun se declararon oficialmente indemnes, como asocede con delles comunidaes vecines nes qu’entá esisten casos de brucelosis. Otros territorios que quedaron llibres de brucelosis bovina son Canarias, Illes Balears, La Rioja, Región de Murcia, Navarra, Euskadi y les provincies castellanes de Burgos, Soria y Valladolid.

L'esfuerciu agora contra la tubercolosis bovina

Depués de llograr qu’Asturies tea considerada llibre de la brucelosis bovina, caprina y ovina, Desarrollu Rural Recursos Naturales va centrar tolos sos esfuercios na llucha contra la tuberculosis bovina, col fin d’algamar la mesma reconocencia.

Contador Estadistiques