Asturies y Galicia van crear un observatoriu de la costa

Los presidentes d'Asturies y Galicia, comunidaes que celebraron esti fin de selmana'l so VII Cume conxuntu, apautaron pidir al Estáu que l'avieyamientu y l'espardimientu poblacional se conseñen "esplícitamente" na reforma del modelu de financiación autonómica como "elementos correctores", col oxetivu de "garantizar la equidá" na prestación de los servicios públicos.

Areces y Touriño aprovecharon el VII Cume Asturies-Galicia que se celebró n'Uviéu pa pautar un "frente común" pa defender qu'estos criterios "diferenciales" se tengan en cuenta nel debate. Principáu y Xunta de Galicia quieren que los sos estatutos nuevos apurran "más espacios fiscales propios pa les comunidaes, suficiencia financiera dinámica "garantizada" y mecanismos de solidaridá" pero sorrayando los condicionantes d'edá y espaciales qu'encarecen la prestación de servicios


Otru de los alcuerdos importantes llograos nel cume ente les dos comunidaes foi la creación d'un Observatoriu de la costa como "ferramienta pa evaluar los instrumentos d'ordenación del litoral desarrollaos en dambes comunidaes" y facer de la costa "una seña d'identidá". L'observatoriu van componelu los conseyeros responsables en materia d'ordenación del territoriu, los directores xenerales d'urbanismu y un técnicu por parte de cada comunidá. Areces declaró que l'oxetivu del Observatoriu va ser el facer de la "España Verde" una marca d'identidá na que la costa astur-gallega sía la meyor protexida"