Asturies y 35 rexones europees más firmaron pa que se llende’l cultivu de tresxénicos

La Directora Xeneral d'Agroalimentación Tomasa Arce participó esta selmana na 4ª Conferencia de Rexones Europees Llibres d'Organismos Xenéticamente Modificaos que se celebró na ciudá bretona de Rennes y na que s'aprobó una declaración que la directora calificó como de "gran importancia con vistes a la protección presente y futura de l'agricultura".
El documentu en cuestión apauta'l derechu a escoyer una agricultura garantizada ensin organismos modificaos, garantizándo-yos a los consumidores productos
Llibres de tresxénicos, la defensa de la biodiversidá, torgando fenómenos d'espardimientu involuntariu d'organismos xenéticamente modificaos nel mediu ambiente y la esixencia de control y responsabilidá xurídica y financiera énte les posibles contaminaciones que se puean producir con material alteriao xenéticamente, sorrayando la obligación d'acutar zones llibres d'organismos xenéticamente modificaos y evitando toa coesistencia cola agricultura convencional per aciu de la prohibición de cultivu de tresxénicos en fazes o zones qu'atiesten con otres nes que se faigan cultivos enxertos en programes de calidá, en zones d'actividá apicultora, pa torgar la contaminación por causa de les abeyes, o na contornada de manantiales d'agua.


Asturies amestárase a primeros d'esti añu 2005 a esta rede de rexones europees opuestes a los cultivos tresxénicos y na que participen otres 36 rexones de los estaos de Francia, Austria, Italia, Inglaterra, Grecia y España, onde tamién Euskadi pertenez a esta rede. En cualquier casu, el poder d'esta plataforma de gobiernos autonómicos nun ye mayor que'l d'otros grupos de presión, en cuantes que ye imposible que les rexones prohiban pola so cuenta los tresxénicos, al nun-yos dar la llexislación europea a les rexones autonomía pa decidir sobre esi estremu, dalgo que yá recordare delles ocasiones la comisaria europea d'Agricultura, Mariann Fischer Boel.