Asturies vive una xornada de fuelga en toles estayes de la Educación en defensa de la escuela pública

Tres dos díes de paru estudiantil, esti xueves Asturies vive una xornada de fuelga en toles estayes de la Educación contra la nomada ‘Llei Wert’. Pela tarde, a les 18 hores, ta convocada una manifestación n’Uviéu con salida na Estación del Norte.

La Plataforma Estatal pola Escuela Pública ye la convocante d’esti paru en toles etapes del sistema educativu, la segunda que se celebra tres la que tuvo llugar en mayu. L’oxetivu ye amosar el descontentu de docentes, estudiantes y padres contra la Llei Orgánica de Meyora de la Calidá Educativa (LOMCE) qu’impulsa’l ministru José Ignacio Wert y reclamar qu’ésta se paralice, al igual que’l decretu de beques y l’aumentu de les tases universitaries. La fuelga vien trés dos díes de paros estudiantiles con un siguimientu importante n’Asturies, cercanu al 80 por cientu según les cifres que manexa’l Sindicato de Estudiantes, porcentaxe que fontes oficiales reduz a un 20 por cientu.

La xornada, que pela mañana va contar con concentraciones en Xixón, Uviéu, Avilés y Cangues, va zarrase con una manifestación peles cais d’Uviéu. Ésta va salir de la Estación del Norte (RENFE) a les 18 hores. Dende los sindicatos educativos esperen un siguimientu importante del paru en defensa de la escuela pública y una asitencia masiva a la marcha de protesta.

Primeres cifres del siguimientu del paru

Según datos apurríos pol Gobiernu d'Asturies a les 13 hores de güei, el 87,7 por cientu del alumnáu d'Infantil y Primaria, y el 95,10 por cientu en Secundaria, nun acudió esta mañana a clase. Mientres, ente los maestros el siguimientu de la fuelga foi del 38,24 por cientu. Nun da cifres del paru na Universidá d'Uviéu.

Por contra, los convocantes sitúen el porcentaxe de docentes que pararon güei nun 78 por cientu y el siguimientu ente l'alumnáu nun 95 por cientu, cantidá que se reduz al 20 por cientu na escuela concertada tanto pa profesores como escolinos. D'igual forma, señalen que'l siguimientu de la fuelga na Universidá foi "total".

Na semeya, imaxe de la protesta celebrada esta mañana n'Uviéu. Autoría: Sindicato de Estudiantes.