Asturies vive les sos primeres eleiciones anticipaes a la Xunta

Esti domingu ye una xornada especial d’eleiciones n’Asturies. El país escueye a los sos representantes na Xunta Xeneral enantes de que fine la llexislatura per primera vegada na so historia y les encuestes nun dan un ganador claru.
 
Según los pronósticos, el Parllamentu taría formáu por cinco grupos políticos, los mesmos que taben hasta agora más UPyD, el partíu de Rosa Díez, que yá tuvo cerca d’entrar na Xunta Xeneral na cita coles urnes de mayu. Mentes, queden en mira otres candidatures como la de la coalición del Bloque por Asturies y Unidá Nacionalista Asturiana, que nesta ocasión sumen al so proyeutu xunitariu ‘Compromisu por Asturies’ a Los Verdes-Grupo Verde. Ente los dos sumaron hai un añu 9.817 votos qu’inviten a les trés formaciones a ser optimistes de cara a algamar una xuba notable que-yos permita averase al escañu. La otra opción asturianista ye Andecha Astur, que nesta ocasión nun se presenta baxo les sigles de Conceyu Abiertu.
 
Un total de 989.732 asturianos, de los que 899.939 son residentes n’Asturies y 89.793, emigrantes, tienen derechu a votu nestes eleiciones, que tamién se destaquen rexistrar el númberu más altu de candidatures, un total de 21. Los partíos que se presenten y los sos candidatos son los siguientes: Bloque por Asturies-UNA-LV-GV (Rafael Palacios), Andecha Astur (Arturu Xosé Bermeyu), PSOE (Javier Fernández), Escaños en Blanco (Luis Prado García), Izquierda Xunida d’Asturies (Jesús Iglesias), Unificación Comunista de España (Roberto González Salvador), Unión Progreso y Democracia (José Ignacio Prendes), Partido Popular (Mercedes Fernández), Foro de Ciudadanos (Francisco Álvarez-Cascos), Unión Renovadora Asturiana (Francisco Javier López Alonso), Solidaridad y Gestión Internacionalista (Francisco Rafael Gómez del Castillo Segurado), PACMA (Carmen Anes), Equo-Los Verdes de Asturias (María del Pilar Calvo), Partido Democrático y Constitucional (Arturo García Rodríguez), Ideas-Hartos.org (Miguel Ángel Villalba), PCPE (Raúl Martínez Turrero) y Movimiento Social Republicano (Jesús Antonio Ruiz Gómez). Amás, pal occidente tamién se presenta la formación galleguista Partido da Terra Eo-Navia, col independiente Anxel Suárez Álvarez como candidatu, y el Partido Humanista nes dos ales. Mentes, nel oriente debuta l’Agrupación de Electores Auseva Red (Nerea Granda) y el Partido Familia y Vida (Pedro Ferrer Piñol). Hai que destacar qu’Ideas-Hartos.org namái se presenta pola circunscripción central y occidental, y Solidaridad y Autogestión Internacionalista, pola central.
 
Los colexos eleutorales van abrir les sos puertes a les 9 hores y los ciudadanos van tener pa votar hasta les 20 hores. Tres el pieslle, va principiar el recuentu de votos, del que vamos a informar al instante nel nuesu especial ‘Eleiciones 2012’. Nél, los nuesos llectores tamién van poder conocer toles reaiciones de los candidatos.