Asturies vive güei la xornada eleutoral

Esti domingu, 22 de marzu, tán celebrándose les eleiciones nacionales y llocales, y n’Asturies.com vamos ufrir tola información d’esta cita coles urnes tres el piesllu de los colexos eleutorales a les 20 hores. Encuentes a pie d’urna, los primeros resultaos y les reacciones de los candidatos van tar a disposición de los nuesos llectores, asina como los datos definitivos pa la Xunta Xeneral y los conceyos, faciendo un siguimientu especial a les fuercies asturianistes.
 
Un total de 901.960 asturianos tienen derechu a votu nestes eleiciones que se presenten más emocionantes que nunca cola entrada na escena política de Foro Asturias Ciudadano (FAC) y la novedá que supón l’alcuerdu ente dos de les formaciones principales del nacionalismu d’izquierda, el Bloque por Asturies y Unidá Nacionalista Asturiana (UNA), tal como demandaba’l sentir xeneral del asturianismu. Dieciocho formaciones aspiren a entrar nesta ocasión na Xunta Xeneral, un récord en democracia.
 
Los principales candidatos a la presidencia del país, como ye vezu, van reunise a última hora d’esta tarde xunto cola militancia mentes se produz el recuentu de votos. Rafael Palacios, de Bloque-UNA, va tar nel Hotel Alcomar de Xixón, mentes que Xuan Xosé Sánchez Vicente na sede xixonesa del PAS (Fonte’l Real, 45). Pela so parte, los cabezaleros de Izquierda Xunida-Los Verdes d’Asturies van axuntase nel Hotel Cervantes; los de la FSA-PSOE, nel Husa Santo Domingo d’Uviéu; los del Partido Popular, nel AC Uviéu; y los del FAC, nel Hotel Regente d’Uviéu.