"Asturies vive de les rentes de los folkloristes decimonónicos"

Con esta frase resumió l'investigador del muséu del Pueblu d'Asturies Jesús Suárez López la situación actual del estáu d'investigación del patrimoniu oral n'Asturies na conferencia que dio ayeri en Muséu de Belles Artes con motivu de la xornada internacional de los museos, dedicada esti añu al patrimoniu inmaterial

Jesús Suárez López, investigador del patrimoniu oral asturianu, foi la persona encargada de dar ayeri la conferencia cola que'l Muséu de Belles Artes d'Asturies y la Conseyería de Cultura celebraben la xornada internacional dedicada a los museos.

El director xeneral de promoción cultural Carlos Madera foi l'encargáu de presentar al investigador, que lleva dende mediaos de los 80 entregáu en cuerpu y alma a un llabor d'investigación reconocíu poles instituciones españoles de más sonadía nel campu de la etnografía, casu del Institutu Ramón Menéndez Pidal. Suárez sorrayó como la llegada de los grandes medios de comunicación, sobremanera de la televisión, y el pasu, yá consumáu, d'una sociedá oral y activa na tresmisión del so patrimoniu a una sociedá d'espectadores pasivos tan desaniciando lo que queda d'un patrimoniu que ta al altor de los meyores d'Europa.

Jesús Suárez centró la so intervención en denunciar la falta de compromisu de les autoridaes asturianes en poner fondos y disposición pa investigar un patrimoniu que ta consideráu como ún de los meyores d'Europa, pero que ta dando les boquiaes pola desapaición física de les últimes persones qu'entovía guarden les ayalgues de la tradición oral en forma de lleendes, cuentos, dichos y cosadielles.

Pa da-y al auditoriu una idea del potencial d'Asturies en patrimoniu oral, el conferenciante asoleyó grabaciones del archivu del Muséu del pueblu d'Asturies en qu'informantes asturianos demuestren como na nuestra tradición oral siguen vives lleendes clásiques de Noruega o romances del ciclu artúricu que nun se sabíen enteros al guardase d'ellos namás que cachos descontestualizaos en recopilaciones del sieglu XVI o de los que namás se tenía conocimientu indirectu.