Asturies va tener representación en São Paulo nun congresu sobre neoloxismos en llingües romániques

Ramón d’Andrés, Sara Gutiérrez Rodríguez y Vanesa Díaz Fanjul, del grupu d’investigación Seminariu de Filoloxía de la Universidá, van participar nun congresu en Brasil la selmana qu’entra. Ésti ta dedicáu a los neoloxismos.
 
El II Congresso Internacional de Neología das Línguas Românicas (Cineo 2011) va celebrase na Universidade de São Paulo ente’l 5 y 8 d’avientu. Dirixíu a investigadores, grupos d’investigación, organismos públicos y privados, y xente interesao na creación lexical y nel desarrollu del léxicu en llingües romániques, ye una continuidá del primeru, celebráu en Barcelona nel añu 2008. Asina, nél van reunise espertos de tol mundo en neoloxía, esto ye, na creación de pallabres nueves.
 
Asturies va tener representación nesti congreso gracies a la participación de Ramón d’Andrés, Sara Gutiérrez Rodríguez y Vanesa Díaz Fanjul, del grupu d’investigación Seminariu de Filoloxía de la Universidá d’Uviéu, que van impartir una conferencia d’una hora baxo’l títulu ‘El observatorio AsturNeo para el estudio de los neologismos en la lengua asturiana", dientro la seición ‘Neoloxía y llingües minoritaries o minorizaes’. La intervención va ser el miércoles a les dos de la tarde, hora llocal.
 
AsturNeo ye l’acrónimu d'Observatoriu Asturianu de Neoloxía, proyeutu d’investigación dirixíu por D’Andrés que dio los sos primeros pasos nel 2010 gracies a un conveniu robláu pola Universidá d’Uviéu, la Universitat Pompeu Fabra y la Conseyería de Cultura d’Asturies. Esta iniciativa investigadora inscríbese na Rede d’Observatorios Neolóxicos establecida nuna serie d’universidaes del Estáu, de la Europa llingüísticamente románica y Llatinoamérica, con coordinación dende la Pompeu Fabra catalana. “L'oxetivu primordial d'AsturNeo ye l'estudiu estadísticu y científicu de los neoloxismos producíos nel asturianu escritu de dellos diarios dixitales en llingua asturiana, faciendo asina un diagnósticu de la vitalidá de la llingua nesti terrén del léxicu”, esplica D’Andrés. Nel congreso brasileñu va facese un presentación d’esti proyeutu, al mesmu tiempu que s’avanzarán dellos resultaos provisionales de les investigaciones feches nos años 2010 y 2011.