Asturies va tener esta llexislatura una 'Film Comission' pa potenciar les producciones audiovisuales

La Conseyera de Cultura y Turismu, Encarna Rodríguez, dixo esta tarde qu'Asturies va contar nesta mesma llexislatura, con una 'Film Commision', una entidá destinada a facilitar a los productores audiovisuales rexonales, nacionales y internacionales tola información que precisen pa la realización de rodaxes o anuncios publicitarios nun determiáu llugar del Principáu.

Rodríguez realizó estes declaraciones na Comisión de Cultura y Turismu na Sala Martínez Marina de la Xunta Xeneral del Principáu d'Asturies, nel marcu de la serie de comparecencies que los distintos conseyeros del gobiernu rexonal realicen estos díes, pa esponer les sos llinies de gobiernu.

"Tenemos les infraestructures y los profesionales necesarios, amás de guapura y diversidá nel territoriu, pa tornar nun bon plató de cine", señaló la conseyera en relación al sector audiovisual. La midida va enartiase na ellaboración d'un Plan Xeneral de la Cultura Asturiana que pretende, ente otros oxetivos, crear les condiciones necesaries que sirvan d'estímulu y canal de desarrollu pa los creadores de distintos sectores culturales.