Asturies va tar estrao de nueches folk esti sábadu

Esti sábadu día trés de xunetu va haber bien d'opciones n'Asturies pa dir de nueche folk, equí vos comentamos les propuestes de Bimenes y Teverga.

Bimenes celebra la VIII Fiesta de la Oficialidá na que recuerden que fueron el primer Conceyu que declaró pola so cuenta y riesgu la oficialidá del asturianu, dende aquella declaración el Conceyu entama tolos años un programa d'actividaes. El vienres día dos a les 19:30 hores na casa la cultura va haber la "V Amosanza de cine n'Asturianu" cola proyección de cuatro cortos, pa pasar darréu a un alderique sobre "Les Posibilidaes del cine n'Asturies". Pa pesllar el día va haber teatru con "Nun Tris" que va facer la so obra "Brenga" sobre mitoloxía asturiana. El sábadu a partir de les 11:00 de la mañana va haber mercáu, pasucais de bandes de gaites, grupos de baille..etc, que van facer que se sienta l'ambiente de fiesta nel conceyu. A les 12:30 el director de la Oficina de Política Llingüística del Principáu d'Asturies Ramón D'Andrés, va lleer el pregón de la fiesta pa pasar depués a una xinta popular nel prau de la fiesta. Pela tarde va haber xuegos y deportes tradicionales y la final del V Concursu Mozu de Gaiteros y Gaiteres onde hai 6 finalistes. El pieslle musical de la fiesta va ponelu "Nuberu" que va actuar a eso de les 21:00 hores.

Los Teverganos nun se queden atrás y tamién decidieron qu'esti sábadu ye un bon día pa preparar una xornada festiva. Dende pela mañana va haber una concentración de caballos, amás d'artesanos y dellos xuegos pa entretener a tola xente quiera averáse hasta La Plaza nel Conceyu de Teverga. Yá pela nueche ta preparáu un espectáculu d'imaxe y soníu de la mano de Celso Peyroux, ello ye qu'a partir de les 23:30 va proyectáse un diaporama sobre la colexata de la Ilesia de La Plaza con más de 300 diapositives de Teverga ambientaes con música. Darréu va siguir habiendo música, pero esta vegada en directo con dos bandes de folk asturianes. A les 23:30 dende Llaviana vienen "Deva Dubra", grupu que ta dando los sos primeros pasos y que va probar suerte esti añu en Lorient nun concursu de grupos folk. Dempués va actuar que ta nel otru estremu, una banda lleva munchos pasos andaos nel folk asturiano, los xixoneses "Lliberdón".