Asturies va ser sede del Ancountro de Blogueiros en mirandés del añu 2020

La xunta añal d’escritores y defensores del mirandés que se celebra en Miranda de l Douro va treslladase a Asturies nel 2020. “La idea que tenemos ye convertir l'actu nun alcuentru ente tolos territorios del dominiu llingüísticu asturllionés”, apunta Inaciu Galán, organizador del XIII Ancountro de Blogueiros de l Praino.

La cita va celebrase n’agostu “a lo llargo de dos o tres díes en dellos conceyos asturianos”, avanza l’ex presidente y anguaño vocal de Rellaciones Institucionales y Internacionales d’Iniciativa pol Asturianu, entidá colaboradora del eventu, qu’apunta que va tener “como exa central dar a conocer n'Asturies la realidá del mirandés, asina como recibir a la xente que trabaya por esta variedá asturllionesa, faciendo porque se sientan como en casa”. En definitiva, “convertir l'actu nun alcuentru ente tolos territorios del dominiu llingüísticu asturllionés, nun momentu especial pa una comunidá llingüística que tovía vive poco conectada, anque los llazos son cada vegada más estrechos, gracies sobre manera a les nueves tecnoloxíes”.

L’Ancountro de Blogueiros de l Praino d’esti añu, celebráu el 10 d'agostu en Dues Eigreijas con representación asturiana, como vien siendo vezu nes ediciones últimes, sirvió pa zarrar los detalles de lo que va ser la xunta con sede n’Asturies, encargada a Galán hai cuatro años cola idea de tender pontes ente dambos territorios. “Queremos implicar a les instituciones d'Asturies, de Miranda y del restu del dominiu llingüísticu, asina como a les entidaes que trabayen pol idioma en cada llugar. Pensamos que ye una oportunidá hestórica de construyir un futuru de mayor collaboración”, asegura l’escritor.

Na semeya, intervención de Galán nel Ancoutro de Blogueiros de l Praino.