Asturies va recibir del Estáu 1.018 millones d'euros nos presupuestos xenerales

Asturies va recibir de los presupuestos xenerales del Estáu 2008 un total de 1.018 millones d'euros, una partida que supón un incrementu del 9,6 por cientu respective a la financiación del 2007, según esplicó'l delegáu del Gobiernu n'Asturies, Antonio Trevín qu'aseguró que "Con estos presupuestos fráyense definitivamente tolos máximos históricos del PP".

Les inversiones p'Asturies previstes nos presupuestos Xenerales suponen el 4,2 por cientu del total del Estáu, casi'l doble del pesu de la comunidá asturiana en términos de la so contribución al PIB -2,2%- y del so porcentaxe de población -2,4%-. Les infraestructures de tresportes -ferrocarriles, puertos y aeropuertos- lleven la mayor parte de la inversión estatal n'Asturies, con 800 millones d'euros, incluyendo una partida presupuestaria de 25 millones d'euros pa l'autovía La Espina-Ponferrada, de los que 16,3 son p'Asturies y 8,7 pa Llión. L'ampliación d'El Musel, con una partida de 194,6 millones d'euros ye la gran estrella de les infraestructures, amás de los 111 millones d'euros pa la variante del Payares, mientres qu'otros 11 millones d'euros, van empobinase a la meyora del abastecimientu d'agua.

En cuantes a vivienda, Trevín manifestó que los Presupuestos Xenerales prevén p'Asturies 6.285 actuaciones, d'elles 1.800 van referise a la construcción de vivienda n'alquiler y ayudes pa propietarios y inquilinos, lo que supón un incrementu d'un 13 por cientu respecto al 2007. El delegáu del Gobiernu esplicó que s'estima que seyan unos 7.200 mozos los que se beneficien d'una ayuda de 210 euros al mes pal pagu del alquiler de vivienda.

Tocante l'apaición nos Presupuestos Xenerales d'una partida concreta destinada a la disminución del portalgu de l'autopista del Val.le Güerna, Trevín recordó qu'al igual que l'añu pasáu, inclúise un capítulu concretu destináu al rescate de los portalgos d'Asturies y Galicia, anque nun esplicó la cuantía del mesmu.

El presidente del Principáu, Vicente Álvarez Areces, valoró los Presupuestos xenerales como una "fortísima apuesta por Asturies del presidente d'España, José Luis Rodríguez Zapatero".