Asturies va pidir al Gobiernu l'Axencia Estatal de Salú Pública

La conseyera Concepción Saavedra confirmó la candidatura asturiana. El diputáu de Sumar, Rafael Cofiño, defendió los merecimientos asturianos pa que s'instale nel país.

El Conseyu de Ministros aprobó ayeri l'anteproyeutu de llei pa la creación de l'Axencia Estatal de Salú Pública, que s'encargará de la vixilancia de la salú de la población, la información y comunicación pública de riesgos, l'entamu d'una respuesta común de tou'l Sistema Nacional de Salud énte posibles crisis sanitaries y el refuerzu global de la salú pública el tol territoriu, ente otros asuntos. Al poco, Cofiño apuntaba la capacidá d'Asturies p'acoyela citando que'l país foi un referente en diferentes temes rellacionaos cola salú pública en periodu prepandémicu, l'Observatoriu de Salú d'Asturies, los programas d'educación afeutivo-sexual, la implantación precoz del programa de prevención en salú bucodental o de prevención d'hipoacusias, asina como'l trabayu en salú comunitaria y promoción de la salú colos conceyos, o'l gran nivel en formación de profesionales de medicina y enfermería familiar, asina como en salú pública y comunitaria.

Güei Saavedra confirmaba la intención d'Asturies de presentar candidatura pa trayer l'axencia porque'l país "ye dende va años un referente en munches árees rellacionaes cola salú pública, la promoción de la salú y la prevención d'enfermedaes, un trabayu que se vio refrendáu na pandemia colo que se conoció como 'la respuesta d'Asturies". "L'Observatoriu de Salú p'Asturies, los nuesos programes d'educación afeutivo-sexual, el trabayu que llevamos años desendolcando sobre determinantes sociales de la enfermedá o nel área de la salú mental pueden convertirnos en firmes candidatos", añadió la conseyera de Salú.

Na semeya, Adrián Barbón esta mañana na sede de Presidencia xunto cola ministra de Sanidá, Mónica García, de visita a Asturies, onde acudió al Centru de Salú d'El Llano, Xixón, y al Hospital Universitario Central d'Asturies (HUCA), n'Uviéu.