Asturies va asumir la tresferencia de Xusticia dende ochobre

El Ministru de Xusticia Juan Fernando López Aguilar, anunció ayeri n'Uviéu la robla de la tresferencia de competencies a l'autonomía asturiana en materia de Xusticia. Nun actu en que tuvieron presentes el Presidente Asturianu Vicente Álvarez Areces y el Conseyeru de Xusticia Javier Valledor dióse anuncia de que la tresferencia va firmase'l 25 de xunetu con un presupuestu de 40 millones d'euros, xusto la cantidá que s'esixía dende Asturies. El trespasu va entamar a facese efectivu'l dende'l 1 d'ochobre y va afectar de mano a la infraestructura y la tecnoloxía. La última parte en tresferise va ser la de personal non xudicial, na qu'entren auxiliares o médicos forenses, y ello va ser pa xunetu del 2007. En total, y ensin contar xueces y fiscales, que nun son oxetu de tresferencia, l'autonomía asturiana va facese cargu de 1.200 trabayadores nuevos.

Fina d'esta miente, y con cerca d'un añu de retrasu sobre la fecha prevista, la tresferencia más importante que-y quedaba por asumir a Asturies nel actual ciclu autonómicu, una tresferencia que foi abondo polémica por causa de la so presupuestación y que tuvo una negociación llarga por demás. La última ufierta del ministeriu de la que se tenía conocimientu allegábase a los 32, 6 millones d'euros, una cantidá que Valledor reconociere que yera insuficiente dafechu y que diba suponer "un esfuerzu más" pa los presupuestos asturianos. De fechu, na última comparecencia pública del conseyeru d'IX-BA pa informar sobre la tresferencia, Valledor diere anuncia de qu'Asturies nun diba poder asumir Xusticia hasta l'añu 2007. Enantes d'ello, el Gobiernu asturianu afirmare a mediaos del mes de xineru que la tresferencia taba paralizada dende'l Ministeriu d'Economía y que yera d'esti organismu del que dependía iguar dellos flecos del procesu.

Amás de les competencies en materia de Xusticia, Asturies tien pendientes les tresferencies dende l'estáu en materia de cuenques hidrográfiques interiores y les de los ferrocarriles de vía estrencha.

Nel actu d'anuncia de la tresferencia de Xusticia, el Presidente asturianu Vicente Álvarez Areces dio anuncia de que na so próxima comparecencia énte la Xunta Xeneral del Principáu diba entamar la ponencia sobre Reforma del Estatutu d'Autonomía asturianu.