Asturies tien el númberu de paraos más baxu dende agostu de 2011

Cerró agostu con 1.775 trabayadores más afiliaos a la Seguridá Social y 419 paraos menos. El númberu de paraos asítiase agora en 79.664 persones.

La directora del Serviciu Públicu d'Empléu del Principáu (Sepepa), Luisa Pérez, destacó la medría d'afiliaciones, del 0,5%, hasta asitiase en 359.029 persones, frente al descensu del 0,81% del conxuntu del estáu.

El paru tamién s'amenorgó un 0,52%, frente a la medría rexistrada n''España, del 0,39%. El númberu de paraos n'Asturies, per debaxo de 80.000 persones, ye'l más baxu dende agostu de 2011.

Por sectores, el paru baxó ente homes y muyeres, en tolos grupos d'edá y nos sectores d'agricultura, industria y construcción, según ente los demandantes ensin empléu anterior.

Según esplicó la directora del Sepepa, nel sector de servicios caltien el númberu de paraos, “magar los datos indíquennos que baxa'l númberu de paraos nes actividaes rellacionaes col turismu, el  comerciu, actividaes auxiliares en xardinería y edificios y l'alministración pública, ente que s'amonta nes actividaes rellacionaes cola educación, la sanidá y los establecimientos residenciales”.

Na comparancia interañal, Asturies contabilizó 5.830 paraos menos que va un añu. El descensu foi del 6,82%. Luisa Pérez destacó la cayida na industria, del 7,17%; na construcción, del 16,6%; y en grupu de demandantes ensin empléu anterior, del 7,69%.