'Asturies tiempu de nosotros' nel Congresu

Sofía Fernández Castañón, diputada de Xuníes Podemos, citó un cachu de la lletra del cantar de Nuberu, amás de los nomes d'Aida Lafuente, Anita Sirgo o Xosefa Xovellanos.

"Esti país ye diversu y nosotres sentímonos mui arguyoses de que sía un país de países. Sentímonos arguyeses de que se falen distintes llingües y onde nun s'escluya a naide. Sentímonos arguyeses de dicir 'la llibertá nun cabe nin na llercia nin nes murnies, nin nos mesmos ataúdes...", espresó la vocera dirixéndose a VOX na so intervención na moción de censura al presidente Pedro Sánchez, con Santiago Abascal como candidatu, condenada al fracasu dende un primer momentu. Les pallabres de Xuan Marcos musicalizaes por Nuberu nel añu 1978 en 'Asturies tiempu de nosotros', a les que siguieron otres en diferentes llingües que se falen nel Estáu.

La intervención de Fernández Castañón entamó con citaciones a Aida Lafuente, la diputada por Asturies Dolores Ibarruri, Dolores Medio,Tina Pérez y Celestina Marrón nuna llista de muyeres –"y non sólo elles, centenares de miles"– "a les que quixeron esborriar con munchu esfuerciu y represión per décades de la historia. Toles pioneres defensores de valores democráticos y republicanos, de los derechos y les llibertaes; les feministes, les antifascistes, les antifranquistes... Elles punxeron el cuerpu y la vida pa que podamos güei falar equí de democracia".

Más alantre tamién nomaría a Xosefa Xovellanos tres enumerar a Maria Mercè Marçal, Rosalía de Castro y María Zambrano.