Asturies, tercer territoriu onde más baxó’l paru nel mes de xunetu

Cantabria, Galicia y Asturies son los trés territorios onde más baxó’l paru en xunetu. Nel nuesu país el descensu foi del 3,47 por cientu, asitiándose’l total de desemplegaos en 72.843, 2.617 menos qu'en xunu, mentes que la ocupación medró un 1,32 por cientu.

Los contratos temporales de branu son el motivu principal d’esti descensu, que nel casu d’otros puntos turísticos adelántase nel tiempu, lo que fai que los trés territorios del norte peninsular rexistren los mayores descensos. Nel casu cántabru, ésti foi del 4,11 por cientu, mentes que nel gallegu, del 6,50 por cientu.

Los datos daos a conocer pol Ministeriu d’Emplegu y Seguridá Social asitien la media estatal nun descensu del 0,80 por cientu, con un total de 3.335.924 desemplegaos tres rexistrar 26.887 menos. Nel llau contrariu, onde medra más el paru ye en La Rioja (1,45 por cientu), Ceuta (1,39 por cientu) y Aragón (1,08 por cientu).

Si comparamos estos datos colos del mesmu mes del añu anterior, n’Asturies el descensu ye del 9,04 por cientu, esto ye, 7.240 paraos menos, siendo la media estatal del 9,43 por cientu. Illes Balears lidera la mengua, con un 14 por cientu, siguíu d’Aragón (13,58 por cientu) y Catalunya (12,18 por cientu), mentes que zarren la llista Melilla (3,32 por cientu), Ceuta (3,74 por cientu) y Canarias (6,11 por cientu).

Cuarta n’incrementu d’ocupación

Asturies ye’l cuartu territoriu nel que más creció l'emplegu en xunetu, al sumar 4.757 afiliaos a la Seguridá Social, lo que supón una medra del 1,32 por cientu con respeuto al mes anterior, hasta contabilizar un total de 365.563 cotizantes. Al respeutive de xunetu del pasáu añu, la Seguridá Social rexistró un aumentu d'altes del 2,33 por cientu y cuenta con 8.309 cotizantes más.