Asturies ta presente na Hannover Messe, dedicada a la industria 4.0

|
Puestu d'Asturies na Hannover Messe

Una delegación institucional y empresarial ta estos díes n’Alemaña pa participar na Hannover Messe, dedicada a la industria 4.0. La intención ye promocionar a Asturies, qu'acude per primer vegada con puestu propiu, como destín d'inversiones énte direutivos d'empreses d'automoción, químiques, electróniques y enerxétiques.

Esta feria ye considerada la más importante del mundu nel sector industrial, con 200.000 visitantes na edición pasada. Asturies acude con un puestu propiu per primer vegada, nel que se tán entamando actos p’amosar les capacidaes teunolóxiques diferenciales de les empresas y centros teunolóxicos y d’investigación asturianos.

Isaac Pola, conseyeru d’Emplegu, Industria y Turismu, encabeza la delegación, formada tamién poles direutores del Institutu de Desarrollu Económico del Principáu d’Asturies (IDEPA), Eva Pando, y d’Asturex, Teresa Vigón; y responsables de ThyssenKrupp, ArcelorMittal, PMG Asturias Powder Metal y Phoenix Contact. Completen la misión representantes del Institutu Teunolóxicu de los Materiales (ITMA), Prodintec, la Fundación Centru Teunolóxicu de la Información y la Comunicación (CTIC) y el cluster industrial del metal Metaindustry4.

Angela Merkel, presidenta d’Alemaña, participó’l domingu na inauguración de la Hannover Messe, que va allargase hasta’l vienres. El puestu d’Asturies na feria, de 48 metros cuadraos, tien llinies vanguardistes, ye abiertu y destaca polos sos elementos gráficos, con imáxenes de les multinacionales con teunoloxía 4.0 con sede nel país, el cluster Metaindustry4 y el Polu del Aceru.

Contador Estadistiques