Asturies ta n'alerta mariella por altes temperatures

Na tarde d'esti martes espérase que los termómetros puedan llegar hasta los 36 graos nel sur del país. L'avisu d'alerta mariella va caltenese pa mañana nel suroccidente, onde yá'l llunes se rexistraron temperatures d'hasta 33 graos en zones como Ibias.

Los momentos más calurosos, según les predicciones de l'Axencia Estatal de Meteoroloxía (Aemet), van danse ente les 14 y les 20 hores de güei. Asina, nel suroccidente algamaránse temperatures alredor de los 36 graos, mientres que na Cordillera Cantábrica y nos Picos d'Europa tarán sobre los 35.

Mañana va continuar el calor en tol país, anque con alerta mariella namái nel suroccidente. En Xixón, los termómetros van llegar a los 24 graos, mentes que n'Uviéu van algamar los 28. El xueves, un frente fríu provocará un descensu destacáu de les temperatures.

Galicia, n'alerta naranxa

Nel restu del Estáu, les temperatures más estremes van darse en Galicia, Extremadura, Comunidad de Madrid y delles zones de Castilla-La Mancha y Andalucía. Nel valle del Guadalquivir podríen llegar güei a los 44 graos.