Asturies supera’l récor de turistes del 2015 en namái diez meses

A falta de los datos de los dos últimos meses del añu, Asturies superó’l récor de dos millones de turistes que rexistró nel 2015. De xineru a ochobre, 2.006.848 persones visitaron el país, un 5,6 por cientu más que nel mesmu periodu del añu anterior.

L’últimu balance del Instituto Nacional de Estadística (INE) dexa estes escelentes cifres que confirmen la salú bona del sector turísticu asturianu. El númberu d’agospios asitióse en 4.943.179, lo que supón un aumentu del 8,5 por cientu en comparanza col mesmu periodu del 2015. Tanto nel númberu de visites como nel d’estancies, estes cifres son les más altes de tola serie histórica.

En rellación colos datos d’ochobre, destaca l’aumentu rexistráu nel númberu d’ocupaciones hoteleres, del 17,7 por cientu, hasta algamar les 370.752 agospios. Pela so parte, el númberu de visitantes medró un 9,7 por cientu, contabilizáronse 174.763 turistes.

Amás, sigue l’enclín al alza del turismu internacional, con 25.154 visitantes de fuera del Estáu, un 19,1 por cientu más qu’hai un añu, y 55.717 nueches, que representen un ascensu del 38,7 por cientu. Nel acumuláu del añu, Asturies recibió 340.703 turistes internacionales, un 14,5 por cientu más, y rexistró 727.930 agospios, esto ye, una medra del  22,9 por cientu.

Gracies a estos aumentos, l’INE contabilizó n’ochobre 4.847 persones emplegaes nel sector, un 7,2 por cientu más que va un añu.