Asturies sumó 12.113 paraos nel añu de la pandemia

|
Paru mázcara

La demanda d’emplegu medró n’Asturies un 17,31 por cientu nel 2020 al aumentar en 12.113 persones, perbaxo de la media estatal, que s’asitió nun 22,90 por cientu. La campaña navidiega nun permitió frenar l’aumentu del númberu de paraos, que suma cuatro meses siguíos de medra al rexistrar 556 más n’avientu.

L’añu de la pandemia de COVID-19 finó con un aumentu de 12.113 desemplegaos tres siete años de tendendecia descendente, les peores cifres dende'l 2009. Sicasí, dende’l puntu más críticu del andanciu, en mayu, hai 1.790 demandantes de trabayu menos, rescampló Pilar Varela, xerente del Serviciu Públicu d’Emplegu del Principáu d’Asturies (SEPEPA).

El total de paraos agora ye de 82.365 polos 69.957 d’hai un añu. Esta medra, del 17,31 por cientu, coloca a Asturies con peores cifres que Melilla (1,19 por cientu), Castilla-La Mancha (9,37), Estremaúra (11,46), Euskadi (13,21), Galicia (14,69) y Cantabria (16,06), liderando la xuba del desemplegu los territorios más dependientes del turismu, Illes Balears (37,99) y Canarias (29,38).

A nivel estatal, el paru crez en 724.532 persones pa poner el númberu total de solicitantes de trabayu en 3.888.137. Ye una medra del 22,90 por cientu.

No que se refier a los datos d’avientu, la medra del paru ye de 556 persones, lo que supón un crecimientu del 0,68 por cientu, tamién perbaxo la media estatal, del 0,96 por cientu, al acumular 36.825 desemplegaos. Namái baxa en Ceuta (4,28 por cientu), Euskadi (2,41), Illes Balears (1,16) y Melilla (1,15), mentes que los datos peores danse en Castilla y Lleón (3,07 por cientu), Navarra (2,81) y Aragón (2,76).

Descensu de les contrataciones y afiliaciones a la Seguridá Social

Hai un descensu nes contrataciones del 0,12 por cientu, tres rexistrase esti mes 18.464 rellaciones llaborales. La baxada ye más marcada no que respeuta a la comparanza con 2019, cuando se roblaron 378.048 polos 246.224 actuales.

Nel mes había afiliaes a la Seguridá Social 360.448 persones, 134 menos qu’en payares, lo que supón un descensu del 0,04 por cientu. La variación interañal rexistra tamién un descensu importante, de 7.225, un 1,97 por cientu, perriba de la media estatal, del 1,86 por cientu.

AdxuntuTamañu
PDF icon Datos del paru avientu 20201.86 MB
Contador Estadistiques