Asturies súmase al Festival Internacional de la Pallabra nel Mundu

|
Cartelu Festival Internacional de la Pallabra nel Mundu 2019

L'Asociación d'Escritores d'Asturies entama un alcuentru poéticu-musical n'Avilés.

La so presidenta, María Esther García López, vien coordinando n'Asturies dende'l 2011 el Festival Internacional de la Pallabra nel Mundu (FIP), que s'allarga tol mes y que se celebra en tol planeta. "La poesía intenta inundar el mundu de versos con collaboraciones de biblioteques, colexos, emisores de radio y TV, universidaes, asociaciones, coleutivos y otres instituciones", esplica sobre esti festival internacional.

L'eventu principal de los previstos nel país va desendolcase esta tarde, a les 20 hores, na sala d'actos del avilesín Hotel 40 nudos y va consistir nun alcuentru poéticu-musical, onde va poder sentise l'asturianu y el castellanu. Los participantes son, amás de la propia Esther García, Agustín Alonso, Carmen Cabeza, Mirta Chamorro, Mercedes García Amado, Ana García de Loza, Marcelino G. Fernández-Luanco, Virginia Gil, Isabel Marina, Carmen Nuevo, Francisco Priegue y Nieves Miesca.

Mentes, la música va correr a cargu de Antonio Peña. "Agora que tamos intentando facer a Asturies Capital Mundial de la Poesía, nunca meyor momentu pa collaborar col FIP 19", anima la presidenta de l'Asociación d'Escritores d'Asturies.

Contador Estadistiques