Asturies suma cuatro casos de coronavirus y Salú aplica midíes adicionales de prevención

El martes rexistráronse dos casos más del coronavirus SARS-CoV-2 y otru esti miércoles, polo qu’hai cuatro persones afeutaes n’Asturies pol virus con orixe en Wuhan. Dada la situación, la Conseyería de Salú ta acabante de tomar la decisión d’aplicar midíes adicionales de prevención pa facer más lenta la so tresmisión.

El sábadu conocióse’l primer casu, l’escritor chilenu residente en Xixón de 70 años Luis Sepúlveda, que se caltién “estable dientro de la gravedá” y sigue aisláu nel Hospital Universitariu Central d’Asturies (HUCA), al igual que la so muyer, de 66 años, que dio negativo en coronavirus en delles ocasiones, anque se ta pendiente d’un análisis del Centro Nacional de Microbiología de Majadahonda. Ayeri dieron positivo dos persones, un mozu de 32 años de Llanes que tuvo esquiando nos Alpes italianos y que “evoluciona de manera favorable”, y una muyer de 85 de Xixón institucionalizada nuna residencia xeriátrica privada que tamién ta “estable dientro de la gravedá”.

Estes dos persones foron treslladaes tamién al HUCA, onde acudirá’l cuartu afeutáu, un home de 48 años que nesti momentu ta aisláu nel so domiciliu depués de qu’esta mañana se confirmara’l so positivo, el cuartu por COVID-19. La zona d’aislamientu del centru uvieín cuenta con 4 places, ampliables a ocho.

Por cuenta del escenariu nuevu, Pablo Fernández Muñiz, conseyeru de Salú, comunicó al Comité de Coordinación d’Asturies Frente al Coronavirus SARS-CoV-2, presidíu por Adrián Barbón, la decisión d’aplicar midíes adicionales de prevención pa facer más lenta la so tresmisión. Tamién esplicó que l’Estáu “sigue en fase de contención” y precisó que “s’incrementó la sensibilidá del sistema de detección”.

Actuaciones del Sespa

El Serviciu de Salú del Principáu d’Asturies (Sespa) repite les recomendaciones dirixíes a los profesionales y desaconseya l’asistencia a congresos, xornaes, seminarios o cursos de formación presenciales, a esceición de les sesiones clíniques de los servicios, una recomendación fecha tamién pol Ministeriu de Sanidá. Pospónse tamién tola actividá docente nos centros sanitarios con casos positivos, restrínxese de manera temporal la presencia de visitadores médicos y voluntarios, ente otros, a hospitales y centros de salud, y lléndase l’acompañamiento de pacientes hospitalizaos o n’Urxencies a un únicu familiar que nun presente fiebre nin síntomes respiratorios agudos.

En rellación coles persones yá afeutaes, el Serviciu de Vixilancia Epidemiolóxica procedió a identificar al so entornu familiar y social, los nomaos ‘contautos estrechos’, p’activar les midíes de control y prevención. Estes actuaciones consisten en vixilar el so estáu de salú, lo qu’inclúi tomes de temperatura y llevar una vida social lo más restrictiva posible.

Mentes, l’atención del 112 refuérzase con personal sanitariu p’atender les consultes de la ciudadanía. Ésti ye’l teléfonu de referencia pa les persones que viaxaron a zones afeutaes pola enfermedá y que presenten los síntomes de fiebre, tos o falta d’aire.

Na semeya, Concepción Saavedra, xerente del Sespa; Fernández Muñiz; Rafael Cofiño, direutor xeneral de Salú Pública; y Ismael Huerta, xefe del Serviciu de Vixilancia Epidemiolóxica.