Asturies sigue perdiendo población ensin galga

|

El nuesu país ye’l territoriu que rexistra los peores númberos del Estáu: les muertes casi doblen a los nacimientos.

Según los datos provisionales correspondientes al 2014 daos pol INE, n’Asturies morrieron 12.813 persones, mentes que namái nacieron 6.600, lo que dexa un saldu vexetativu negativu de 6.213 individuos.

La tasa bruta de mortalidá –finaos por cada 1.000 habitantes– ye la más alta de tol Estáu, a ser de 12,2, cuando la media ye de 8,5. Tres Asturies asítiase Castilla y Lleón, con 11,2, y Galicia, con 10,9. No que correspuende a nacimientos, el nuesu país ocupa la posición cabera, con 6,3, siendo 9,1 la media estatal. Delantre d’Asturies tán Galicia y Castilla y Lleón, con 7,2 dambes.

Per primer vegada nos cinco años últimos, aumentó’l númberu de nacimientos nel Estáu al rexistrase 588 más, un curtiu 0,1 por cientu. Nel casu asturianu, esta cifra mengua un 1,1 por cientu, anque dexa per detrás a Cantabria (-5,5 por cientu), Castilla-La Mancha (-4,4 por cientu) y La Rioja (-2,5 por cientu).

No que correspuende a les muertes, la medra ye del 1,8 por cientu; n’Asturies, del 0,72 por cientu.

Cifres esmolecientes

Les cifres demográfiques que presenta Asturies son más qu’esmolecientes, con una dinámica que nun acaba de variar. El descensu de la natalidá condena al nuesu territoriu a ser ún de los más avieyaos del Estáu y inclusive d’Europa, a lo qu’hai sumar l’aumentu de la emigración, con miles de mozos y moces asturianos obligaos a colar pola murnia situación económica asturiana del país.

Contador Estadistiques