Asturies rexistró 380 quemes nuna selmana

El Gobiernu rebaxó'l Plan Especial de Quemes Forestales (INFOPA) al nivel d’alerta, l’habitual por estes feches de peligru altu y mediu, depués de siete xornaes de llucha ensin descansu contra’l fueu. En total rexistráronse 380 quemes en 39 de los 78 conceyos del país, amburando más terrén nesta selmana qu’en tol 2018.

Dada la incidencia escasa de quemes, con un total de 7 incendios nesi momentu, 3 activos y 4 controlaos, y la espera de les lluvies fuertes que se dieron finalmente na tarde d’ayeri, el conseyeru de Presidencia y Participación Ciudadana, Guillermo Martínez Suaréz, decretó ayeri a les 14.31 hores el pasu a fase d’alerta del INFOPA. Yá pela mañana, a les 10.15 hores, baxáralu de situación 2 a 1.

El nivel d’alerta ye l’habitual nestes feches de peligru altu y mediu de quemes forestales. Activóse’l 15 de xineru y permanecerá asina hasta’l 30 d’abril si nun se producen episodios nuevos.

Dende’l xueves y hasta ayeri Asturies rexistró 380 quemes, la mayor parte d’elles provocaes. La situación agravóse’l domingu, cuando s’activó la situación 2 del INFOPA, que permite la intervención de medios non asignaos al plan, como pue ser la Unidá Militar d’Emerxencies.

En total más de 400 efeutivos trabayaron estos díes na estinción de los fueos, qu’amburaron en seis díes una cantidá de terrén superior a la que quemó nel 2018, cuando se rexistraron 2.054 hectárees afeutaes. La situación provocó numberoses quexes contra la política forestal del Gobiernu, con reclamaciones de que se torne a prohibir el pastoríu nes zones qu’ardieron.

Na imaxe, una zona de monte depués del pasu del fueu. Semeya propiedá de l'Asociación Profesional de los Axentes del Mediu Natural del Principáu d'Asturies (AGUMNPA).