Asturies rexistra nel 2017 los meyores datos turísticos de la historia

El país tuvo 2,3 millones de visitantes.

Los datos publicaos güei pol Instituto Nacional de Estadística (INE) reflexen qu'Asturies recibió un 5,3 por cientu más de turistes que nel 2016, con un total de 2.320.771 visitantes. No que respeuta a nueches d'agospiu, rexistróse 5.625.874, una medra del 6 por cientu.

Estes cifres represente un crecimientu superior a la media estatal, qu'aumentó un 4,5 por cientu y 3,5 por cientu, de manera respeutiva. No que respeuta a los territorios cantábricos, que se promocionen baxo la etiqueta de 'España Verde' (Galicia, Asturies, Cantabria y Euskadi), la medra ye del 4,9 y el 5,8 por cientu.

Los datos provisionales disponibles apunten a un incrementu del gastu turísticu total del 8,2 por cientu. Amás, el valor añadíu brutu roza los 2.200 millones, con una aportación a la economía asturiana del 10,72 por cientu.

Esta evolución positiva tradúxose tamién na creación de puestos de trabayu nuevos, pasando de los 42.908 del 2016 a los 45.750 del 2017, lo que supón el 12,39 por cientu del emplegu total del país. El Gobiernu va incrementar anguaño la inversión destinada a promoción internacional y va impulsar les campañes de productos que sofiten la desestacionalización, pa lo que va aprovechar la oportunidá especial que brinda la conmemoración nel 2018 de los centenarios venceyaos a Cuadonga: 1.300 años de los oríxenes del Reinu d'Asturies, un sieglu de la creación del Parque Nacional de la Montaña de Covadonga, anguaño de Picos de Europa, y el primer centenariu de la coronación canónica de la Santina.