Asturies rexistra la cifra más alta de casos nuevos de VIH dende'l 2012

|
Edificiu ONX New York VIH-Sida

Nel 2017 detectáronse 82 infeiciones n'Asturies, el 94 por cientu por rellaciones sexuales ensin proteición, de les qu'un 42 por cientu yeren heterosexuales. Esti sábadu, 1 d'avientu, celébrase'l Día Mundial de la Llucha contra'l Sida, una enfermedá que n'Asturies vive un espoxigue frayando asina l'enclín d'años anteriores.

Esti aumentu podría rellacionase cola meyora nel accesu a les pruebes rápides que se realicen fuera del ámbitu sanitariu y que se punxeron en marcha en 2017, según apunten dende la Conseyería de Sanidá, pero lo cierto ye que l'amenorgamientu de la percepción de riesgu inflúi tamién nesta medra. El Gobiernu, xunto col Colegio Oficial de Farmacéuticos del Principado de Asturias y el Comité Ciudadano Antisida, estendieron a tol país el programa que facilita los test rápidos del Virus d'Inmunodeficiencia Humana (VIH) y que se traduxo na práutica de 994 esames, 850 más que nel añu anterior.

La mayor parte de les infeiciones nueves produxéronse per tresmisión sexual, de resultes de rellaciones homosexuales, bisexuales y heterosexuales ensin proteición, lo qu'asocedió nel 94 por cientu de los casos. Un 52 por cientu tuvo'l so orixe en rellaciones ente homes, mentes que'l 42 por cientu respuende a contautos heterosexuales, con una incidencia del 56 por cientu en paisanos y del 44 por cientu en muyeres. Les práutiques de riesgu nel consumu de drogues per vía endovenosa tán detrás del 4 por cientu de los positivos nuevos, un porcentaxe que yera bien superior va años y sigue baxando progresivamente.

Diagnósticos tardíos

El 80 por cientu de les infeiciones nueves correspuende a homes y el grupu d'edá más numberosu ye'l de 35 a 44 años pa dambos sexos. Los casos detéctense sobre manera nes árees urbanes del país y cerca de la metá, el 49 por cientu, correspuéndese col Área Sanitaria V, qu'inclúi los conceyos de Xixón, Carreño y Villaviciosa. L'amenorgamientu de la perceición de riesgu pue llevar a un menor númberu de diagnósticos y a qu'estos se realicen de manera tardía, como asocede nel 57 por cientu de los nuevos casos, lo que supón un gran problema pal individuu y la población polo xeneral.

Poro ye fundamental que tanto los profesionales sanitarios como la ciudadanía sían conscientes de la importancia de detectar la infeición lo más pronto posible y de que cualquier persona que realice práutiques de riesgu ye vulnerable al VIH. El retrasu nel diagnósticu trai, amás, un mayor deterioru del sistema inmunitariu y un peor pronósticu, yá que'l paciente nun pue beneficiase de los tratamientos dende'l primer momentu, amás de que tamién supón que la persona afeutada nun adoptaría les midíes necesaries pa nun tresmitir la enfermedá.

Asina, esti añu'l Día Mundial de la Llucha contra'l Sidra lleva'l lema 'Conoz el to estáu', animando a la población a que se faiga la prueba del VIH.

Na imaxe, edificiu de la Organización de les Naciones Xuníes en New York col llazu que simboliza la llucha contra'l Sida. Semeya de la ONX/Eskinder Debebe.

Contador Estadistiques